புற்றுநோயைத் தடுக்கும் பிஸ்தா..!

சக்தி வாய்ந்தவர்களாக தங்களை காட்டிக்கொள்பவர்களை, ` என்ன பெரிய பிஸ்தாவா?’ என்று கேட்கும் வழக்கம் நம்மிடம் உள்ளது. இந்த பிஸ்தாவைவிட, பருப்பு வகையைச் சேர்ந்த பிஸ்தாவுக்கு சக்தி நிறையவே உள்ளது.


இதனால்தான், புதிதாய் திருமணம் ஆனவர்களையும், திருமணம் முடிவானவர்களையும், `பாதாம், பிஸ்தா, முந்திரி எல்லாம் சாப்பிட்டு, உடம்பை தேத்துபா…’ என்கிறோம்.

இப்படி சிறப்புமிக்க பிஸ்தாவுக்கு என்றே உலக அளவில் ஒரு தினம் கொண்டாடுவது எல்லோரும் அறிய வேண்டிய ஒன்று.

சிறிய முடப்பட்ட திண்ணமான ஓட்டிற்குள் பச்சை நிறத்தில் காணப்படும் பிஸ்தாவை `பிஸ்தாச்சியோ’ என்று உலக அளவில் அழைக்கிறார்கள்.

30 வகையான வைட்டமின்கள், மினரல்கள், பைடோ ஊட்டச்சத்துகள் உள்ளிட்ட பல வகையான சத்துக்கள் பிஸ்தாவில் நிறைந்துள்ளன. மத்திய கிழக்கு பகுதியில் முதன் முதலாக கண்டுபிடிக்கபட்ட பிஸ்தா மரம், உலகின் மிக பழமையான பருப்பு வகை மரங்களுள் ஒன்றாகும்.

கி.மு.7 ஆயிரம் ஆண்டுகளுக்கு முன்பே மனித இனம் இந்த பிஸ்தா மரத்தை பயிரிட்டு, அதன் பலனை அனுபவித்துள்ளது. அமெரிக்காவில் 1903 முதல் அங்குள்ள கலிபோர்னியா மாகாண பகுதிகளில் இந்த மரங்கள் அதிக அளவில் பயிர் செய்யபட்டன. உலகிலேயே இங்குதான் அதிக அளவில் பிஸ்தா உற்பத்தி செய்யபடுகிறது.

சீனர்களும் பிஸ்தாவின் பலத்தை நிறையவே உணர்ந்திருக்கிறார்கள். அவர்கள் இந்த பருப்பை `மகிழ்ச்சியான பருப்பு’ என்று அழைக்கிறார்கள். பிஸ்தா பருப்பின் வடிவத்தை வைத்தே, அதாவது அதுவாய் திறந்து பல்தெரிய சிரிப்பதுபோல் காணபடுவதால் இந்த பெயரை அவர்கள் அதற்கு சூட்டியுள்ளனர்.

சீனர்கள் ஒவ்வொரு புத்தாண்டையும் கொண்டாடும்போது, இந்த பிஸ்தா பருப்புகளை அனைவருக்கும் வழங்கி மகிழ்கிறார்கள். ஆரோக்கியம், சந்தோஷம், ராசியான எதிர்காலம் ஆகியவற்றின் சின்னமாக அவர்கள் பிஸ்தாவை கருதுவதுதான் இதற்கு காரணம்.

கலிபோர்னியாவில் அதிக அளவில் பிஸ்தா உற்பத்தி செய்யபட்டாலும், அதை அதிக அளவில் சாப்பிடுபவர்களின் பட்டியலில் நம்பர் ஒன் இடத்தில் இருப்பவர்கள் சீனர்கள் தான். தனி நபராக எந்த நாட்டினர் அதிக அளவில் பிஸ்தா சாப்பிடுகிறார்கள் என்று கணக்கெடுத்தால், அதில் முதலிடம் பிடிப்பவர்கள் இஸ்ரேலியர். இவர்களது நொறுக்குத் தீனிகளில் பிஸ்தாவும் முக்கிய இடம்பெறுகிறது.

இந்தியாவில் உஷ்ண பொருளாக பிஸ்தாவை பார்ப்பதால், அதை பயன்படுத்துபவர்களின் எண்ணிக்கை மற்ற நாடுகளுடன் ஒப்பிடும்போது குறைவுதான். இந்தியாவில் பிஸ்தாவை அப்படியே சாப்பிடாவிட்டாலும், கேசர் பிஸ்தா சர்பத், ஐஸ் கிரீம், பிஸ்தா குல்பி ஆகியவற்றில் பிஸ்தா பயன்படுத்தபட்டு, இந்தியர்களால் சாப்பிடபடுகிறது.

ரஷ்ய நாட்டினர் கோடைகாலத்தில் பீர் குடிக்கும்போது, அதற்கு சைடு டிஷ் ஆக பிஸ்தா உட்கொள்வதை வழக்கமாக கொண்டுள்ளனர். பிரான்ஸ் நாட்டினர், சாப்பிடுவதற்கு முன்பு பசியை அதிகரித்துக் கொள்வதற்காக மதுபானத்துடன் சிறிதளவு பிஸ்தாவையும் எடுத்துக்கொள்கிறார்கள்.

பிஸ்தா சாப்பிடுவதால் கிடைக்கும் பயன்கள் : தினமும் பிஸ்தா சாபிட்டு வந்தால் நுரையீரல் புற்றுநோய் உள்ளிட்ட பிற புற்றுநோய்கள் வராமல் தடுக்கலாம் என்று அமெரிக்க புற்றுநோய் ஆய்வு சங்கம் அறிவித்துள்ளது. வெள்ளை ரொட்டிடன் கையளவு பிஸ்தா உட்கொண்டு வந்தால் ரத்தத்தில் சர்க்கரையின் அளவு அதிகரிப்பு கணிசமாக குறையும். மேலும், பசியை தூண்டி விடுகிறது என்றும் ஆய்வாளர்கள் நிருபித்துள்ளனர். பிஸ்தாவில் குறைந்த அளவு கலோரி, குறைந்த அளவு கொழுப்புடன் அதிக அளவில் நார்ச்சத்து இருபதால் உடல் எடை அதிகம் கொண்டவர்கள், பிற உணவை குறைத்து அதற்கு பதிலாக பிஸ்தாவை உட்கொள்ளலாம் என்கிறார்கள். ஒன்று அல்லது இரண்டு கை நிறைய தினமும்பிஸ்தா சாப்பிட்டு வந்தால் உடலில் உள்ள கெட்ட கொழுப்புகளின் அளவு குறையும் என்கிறது ஒரு ஆய்வு.

மூளையை பலப்படுத்தும் உணவுப் பொருட்கள்

நாம் அன்றாடம் எடுத்துக் கொள்ளும் உணவில் தான் சிறந்த உடல் நலத்தை பெற முடியும் என்று நீங்கள் நம்புகின்றீர்களா? அப்படியானல் எந்த வகையான உணவை தினமும் எடுத்துக் கொள்ளலாம்....

மாணவர்களின் மூளை அன்றாடும் பலவிதமான வேலைகளை செய்து வருகின்றது. பல்வேறு பிரச்னைகள் தீர்ப்பதில், கற்றல், படித்தல், தேடுதல் என்று பல உயிரி-வேதியியல் செய்முறைகளை செய்து வருகின்றது.

இந்த பணிகளை தொடர்ச்சியாக செய்வதற்கு மூளையின் செல்கள் ஆரோக்கியமாக இருப்பது அவசியம்.

ஆரோக்கியமான உணவுப் பொருட்களை உட்கொள்வதின் மூலம் மூளைக்கு செல்லும் நரம்புகள் சுறுசுறுப்பாக இயங்குகிறது. மாணவர்கள் வகுப்பறையில் முழு ஈடுபாட்டுடன் இயங்குவதோடு, இலக்குகளை சுலபமாக கைபற்ற உறுதுணையாக உள்ளது.

ஊட்டச்சத்து அதிகமாக உள்ள பலவகை உணவு பொருட்கள் மூளை இயக்கத்திற்கும், செயல்பாட்டிற்கும் உதவி புரிகிறது.

• பைபர் நிறைந்த ஓட்ஸ், ஓட்ஸ், பழுப்பு அரிசி, கோதுமை, ரொட்டி மற்றும் பழுப்பு பாஸ்தா போன்ற உணவு பொருட்களும், தாணியங்களும் உணவில் சேர்த்துக் கொள்ளலாம்.

• ஒமேகா 3 என்ற கொழுப்பு அமிலங்களை எடுத்துக் கொள்வதால் மூளையில் உள்ள செல்கள் ஆரோக்கியமாக பணிபுரிய உதவுகிறது. இந்த ஓமேகா பெரும்பாலும் கடல் உணவுப் பொருட்களான மீனில் அதிகம் காணப்படுகிறது.

• கருப்பு திராட்சையில் ஆன்டி-ஆக்ஸிடன்ட் அதிகமாக உள்ளதால், ஞாபக சக்தியை அதிகரிக்கிறது.

• நட்ஸ் போன்ற உணவு வகைகளில் வைட்டமீன் இ அதிகமாக உள்ளது. இதை, தினமும் உணவில் சேர்த்து கொள்ளலாம்.

• கீரை வகைகளில் உயர்தர மெக்னீஷியம், பொட்டாசியம் அதிகம் உள்ளது. இது மூளையை வலுவடைய செய்கிறது.

• ஒரு நாளைக்கு குறைந்தபட்சம் 2 லிட்டர் தண்ணீர் எடுத்துக் கொள்வது நல்லது.

• வைட்டமீன், பி6, வைட்டடமீன் பி12, கால்சியல், மெக்னீஷியம், பொட்டாசியம் போன்ற சத்துக்கள் பாலில் அதிகம் உள்ளது.

• அன்றாடம் ஒரு காய்கறியாவது உணவில் எடுத்துக் கொள்ள வேண்டும்.

மாணவர்கள் உட்கொள்ளும் உணவு பொருட்களில் தினமும் இதை பின்பற்றி வந்தால், உடல் ஆரோக்கியமாக இருப்பதோடு, மூளையும் வலுவு பெறுகின்றது.

புற்றுநோய் தடுக்கும் சிவப்பு உணவுகள் !

சிவப்பு மற்றும் அடர் சிவப்பு நிறக் காய்கறி, பழங்களில் ஆந்தோசயானின், லைகோபீன் ஆகிய ஊட்டச்சத்துக்கள் செறிந்துள்ளன. இவற்றை, தினசரி உணவில் சேர்த்துக்கொள்வதன் மூலம், சில வகை புற்று நோய்கள் வராமல் தடுக்கலாம். குறிப்பாக, லைகோபீன் சத்து, ப்ராஸ்டேட் புற்றுநோய்க்கான வாய்ப்பைக் குறைக்கிறது. அதனால், இந்தக் காய்கறிகளை தினசரி  சேர்த்துக் கொள்ளும்படி, அமெரிக்காவின் தேசிய புற்றுநோய் நிறுவனம் பரிந்துரை செய்கிறது. ஆந்தோசயானின் உயர் ரத்த அழுத்தம், சர்க்கரை நோய்க்கான வாய்ப்பைக் குறைக்கிறது.

மாதுளை ஆன்டிஆக்ஸிடன்ட் நிறைந்த பழம். இரும்புச் சத்து, வைட்டமின் ஏ, சி, இ, கால்சியம், பொட்டாசியம், பாஸ்பரஸ், ரிபோஃப்ளேவின் போன்ற சத்துக்களின் பட்டியல் இதில் அடங்கும். கொழுப்பைக் குறைத்து இதயம் தொடர்பான பிரச்னைகள் வராமல் காக்கும். உயர் ரத்த அழுத்தம் மற்றும் ரத்த ஓட்டத்தைச் சீர் செய்யும். ரத்த சோகை உள்ளவர்கள் அவசியம் சாப்பிட வேண்டிய பழம். சர்க்கரை நோயாளிகள் குறைவாக எடுத்துக்கொள்ளலாம். சருமத்துக்குப் புத்துயிர் தந்து, செல்களைப் புதுப்பிக்கும். மூப்படைதலைத் தாமதப்படுத்தும். மார்பகம், ப்ராஸ்டேட், சருமப் புற்றுநோய்கள் வராமல் தடுக்கும். இதன் சாறு, செரிமானத்துக்குச் சிறந்தது. கர்ப்பிணிகளுக்கு மிகவும் நல்லது.



தக்காளி

வைட்டமின் ஏ இருப்பதால், பார்வைத் திறன் அதிகரிக்கும். லைகோபீன் இருப்பதால் நுரையீரல், ப்ராஸ்டேட், வயிறு தொடர்பான புற்றுநோய்கள் வராமல் பாதுகாக்கும். ரத்த ஓட்டம் மற்றும் ரத்தக் கட்டுக்கள் தொடர்பான பிரச்னைகளைக் குணப்படுத்தும். ரத்த நாளங்களில் கொழுப்புப் படியாமல் காக்கும். கொலஜன் இருப்பதால், சருமச் சுருக்கங்களைத் தடுக்கிறது. உடலில் இருக்கும் நச்சுக்களை வெளியேற்றவும் தக்காளி உதவுகிறது. மலச்சிக்கல், வயிற்றுப்போக்கு போன்ற பிரச்னைகள் வராமல் தடுக்கப்படும்.

சிவப்பு மிளகாய்

வைட்டமின் ஏ, சி இதில் அதிகம். அடர் சிவப்பு நிறம் என்றாலே, அதில் பீட்டாகரோட்டீன் இருக்கும். சுவாசக் குழாய்கள், நுரையீரல், குடல், சிறுநீரகக் குழாய் போன்றவற்றுக்கு நல்லது. அளவாகச் சாப்பிடலாம். செரிமானத்துக்கு உதவுகிறது. ரத்தத்தில் உள்ள சர்க்கரையின் அளவைக் கட்டுப்படுத்துகிறது. மிளகாயில் உள்ள காப்சைசின் (Capsai cin) என்ற ரசாயனம், நரம்பு மண்டலத்துக்குச் சென்று நல்ல மனநிலையை ஏற்படுத்தும்.

ஆப்பிள்

ஆன்டிஆக்ஸிடன்ட் நிறைந்த பழங்களில் உயர்ந்த இடத்தில் இருப்பது ஆப்பிள். நார்ச்சத்துக்கள், வைட்டமின் சி மற்றும் குறைந்த கலோரிகள் கொண்டது. கொழுப்பு இல்லாதது.  இதில் உள்ள பாலிபீனால்ஸ் (Polyphenols), ஆன்டிஆக்ஸிடன்டாகச் செயல்படுகிறது. தொடர்ந்து ஆப்பிள் சாப்பிடுகையில், இதய நோய்கள் வராமல் தடுக்கப்படும். நல்ல கொழுப்பை (HDL) ஆப்பிள் உயர்த்தும் என்கின்றன சில ஆய்வுகள். ஆப்பிளை கடித்துச் சாப்பிடும்போது, உமிழ்நீரைச் சுரக்கச்செய்து, கிருமிகளிடமிருந்தும், பற் சிதைவுகளிடமிருந்தும் பற்களைப் பாதுகாக்கும். ரெட் ஆப்பிளில் உள்ள குவர்செட்டின் (Quercetin) என்ற ஆன்டிஆக்ஸிடன்ட் நோய் எதிர்ப்பு சக்தியை மேம்படுத்துகிறது.

தர்பூசணி

தண்ணீரும், இயற்கையான சர்க்கரையும் நிறைந்த பழம் தர்பூசணி. வைட்டமின்கள், தாதுக்கள், லைகோபீன் போன்ற ஆன்டிஆக்ஸிடன்ட், குறைந்த அளவு கலோரிகள் இதில் உள்ளன. 92 சதவிகிதம் நீர்ச் சத்து உள்ளதால், தாகத்தைத் தணிக்கும். உடலில் உள்ள நீர்த் தன்மையைச் சரிசெய்யும். இதில் உள்ள ஆன்டிஆக்ஸிடன்ட் புற்றுநோய் செல்கள் உருவாவதைத் தடுக்கும். செரிமானத்துக்கு உதவி, மலச்சிக்கலைப் போக்குகிறது. வைட்டமின் ஏ உள்ளதால் கண், சருமத்துக்கு நல்லது. சீபம் சீராகச் சுரக்க உதவுவதால், சருமம், கூந்தல் ஆரோக்கியமாக இருக்கும்.

சிவப்பு கொய்யா

வைட்டமின் சி நிறைந்தது. புற்றுநோய் செல்களை வளரவிடாமல் தடுக்கும். நார்ச்சத்து அதிகம் இருப்பதால், செரிமானம், மலச்சிக்கல் பிரச்னை குணமாகும். கேரட்டில் உள்ள ரெட்டினால் (Retinol) சிவப்பு கொய்யாவிலும் உள்ளதால், பார்வைத் திறன் கூடும். போலேட் என்ற தாதுஉப்பு இனப்பெருக்க உறுப்புகளை மேம்படுத்தும். லைகோபீன் சத்துக்கள் உள்ளதால், அலர்ஜி, ஆஸ்துமா போன்ற நோய்களுக்கு மிகவும் நல்லது. மூப்படைதலைத் தாமதப்படுத்தி, சருமச் சுருக்கங்கள் ஏற்படாமல் காக்கும்.

30 வயதில் எலும்பு அடர்த்தி குறையுமா ?

30 வயதில் இரண்டில் ஒரு பெண்ணுக்கு லோ போன் டென்சிட்டி பிரச்னை வரும். அது நீங்களா?’, ‘கால்சியம் போதவில்லை எனில் இடித்துக் கொண்டாலே, எலும்பு உடைந்துவிடும்’ இப்படி பெண்களை அச்சுறுத்தும் விளம்பரங்கள் அதிர்ச்சியைத் தருகின்றன. இது உண்மையா?

எலும்பும் ஒரு திசுதான். புதிய எலும்பு செல் உருவாவதும், வயதான செல் மறைவதும், உடலில் தொடர்ந்து நடந்துகொண்டிருக்கும். பொதுவாக, வயது அதிகரிக்கும்போது, எலும்புகளின் அடர்த்தி  குறையும். அதிக அளவில் குறையும்போது, எலும்பு தொடர்பான பிரச்னைகள் வருகின்றன.

கால்சியம், வைட்டமின் டி போன்ற ஊட்டச்சத்துக்கள் குறையும்போதும், எலும்பின் அடர்த்தி குறைகிறது. இதனால், எலும்பு பலவீனமடையத் தொடங்கும். பிறந்த குழந்தைகளுக்கு எலும்பு மிகவும் மிருதுவாக இருக்கும். குழந்தை வளர வளர, எலும்புகள் உறுதியடையும்.  எலும்புகள் வலு குறைந்துபோனால், லேசாகத் தவறி விழுந்தாலும், எலும்பு முறிவு ஏற்பட்டுவிடும். இளம் வயதில் எலும்பு ஆரோக்கியத்துடன் இருந்தால், அடிக்கடி எலும்பு முறிவு ஏற்படாது.